Душі, ид котрым уже не прийдут
Доброго здōрōвлїчка, цімборы! Днеська вам хōчу розказати за дашто, што ня дуже болит. Ходив им на теметӯв, де ми спочивавут дїды ай прадїды. Много м днесь споминав си за дїдика, котрого м застав лиш крайчиком ока. Його вже хоронили на нōвōму теметōві, котрый кличут туй “керечанка”, спозад горы на кōтрӯв стойит. За дїда сам тямлю не много, майбӯлш што ми розказовали у родинї, ходив им му запалити свічку тоже. Учила ня мамка, ож свойих треба чистовати, ож треба прийти на теметӯв тай спомнити за душі тых, дякувучи кōму днесь им туй. На керечанцї было читаво много люди, захарювут, вымывавут, палят свічкы, сōкōтят своє. Каждый прийшōв си спомнити за родину.
Айбо сперед тым, як пӯйти на “керечанку”, заскочив им на старый теметӯв. Там ми лежит щи єден дїдо, што нас лишив у рокови 1967, кōй мōюй мамцї было лиш 6 годикӯв. На сьōму теметōві было многым май сумно, ходив им там домак сам. Дїдиковый грӯб найшōв им наскоринько, тямлю де є, бо щи дїтваком ня сюды водила мамка, щи сам им ріхтовав памнятну табулку на хрестови, кōй поиржавіла стара. Днись там стойит уже гранїтный памнятник.
Ай болит ня другоє — пусті гробы, попиля котрых ниє никого, ани свічкы, ани чічкы. Позарывані камняні хресты, уже даже не видко де быв сам грӯб, лиш груды земли туй тай там. Ходив им помежи них ревучи, рōзумівучи ож ид сим уже нитко ни прийде, хōть йих правнукы тай праправнукы сут туй из нами, тōпчут єдну зо мнōв землю. Хōчу розказати вам за дакотрых из них.
На образчикови высше грїє ми серце ож написали му посправдїшньоє имня — Митер. Бо сяк му люди ачий казали. Мōї обідві бабкы сут записані ги “Поліна”, хōть доґдеєдного живі люди йим навхтема казали Поланьо. Слово “Поліна” жило лиш на папірьови, бо сяк было “мусай” писати. Болит ня ож ани єдна моя бабка си ни заслужила даже своє имня мати на гробови си.
Исе сут люди, котрых уже ачий нитко не тямит, нитко ид ним не прийде покласти свічку, нитко не прийде ся за них помолити, нитко не приведе сюды свойих дїти упōвісти “туй ти лежит прадїдик, туй му грӯб, добрый быв чилядник, поклав хыжу де м росла”. Та гадаву си, ож спōмню за них днеська я, бо бӯлше нїкōму.
Ай обіцяву ся вам, ож буду водити свойих дїти на грӯб ид дїдикам обом, буду йим розказовати тко были тоты люди, тай чого бы йих треба тямити тай честовати. Бо дерево без кōрїня далеко ни выросте. Хōтїв бы м вас попросити, обы сьте на другый раз тоже узяли си дїти на теметӯв, тай указали йим де сут йих “кōрїня”. Обы грӯб вашого дїдика ни быв у сякӯм порядку, ги але сесї што йих видете на подобенках.
Дуже ся надїву ож мōї слова дадут дакōму ідею ся прӯйти на старый теметӯв тай найти си далеку родину, дякувучи кōтрӯв мы теперь ходиме по сюв земли, дякувучи кōтрӯв можеме мати ай свойих дїти.
